ထူးချစ် – ခွန်သောမတ်စ်
ထိုင်းအစိုးရ၏ ပညာရေးမူဝါဒအရ နိုင်ငံခြားသား (ရွှေ့ပြောင်း)ကလေးများ ပညာသင်ယူခွင့်သည် ထိုင်းကလေးများကို မထိခိုက်စေဘဲ ရေရှည်လူမှုပြဿနာများ ဖြေရှင်းနိုင်မည်ဖြစ်သည်။
ထိုင်းနိုင်ငံ ဘန်ကောက်မြို့တွင် ထိုင်းကလေးငယ်အားလုံးအတွက် ပညာသင်ယူရန် နေရာအလုံအလောက်ရှိပြီး နိုင်ငံခြားသား ရွှေ့ပြောင်းကျောင်းသူကျောင်းသားများအား လက်ခံခြင်းသည် တရားမဝင် အလုပ်သမား ပြဿနာကို ဖြေရှင်းရန်နှင့် ရာဇဝတ်မှုလျှော့ချရန် ကူညီအထောက်ကူပြုနိုင်ကြောင်း ဘန်ကောက်မြို့တော် ဒုတိယ မြိုတော်ဝန် ခွန်စနွန် ဝမ်စံဘွန် (Sanont Wangsangboon) က ၎င်း၏လူမူကွန်ယက် (Facebook) စာမျက်နှာ “Wangsangmuang” တွင် ရေးသားဖော်ပြခဲ့သည်။
အသက် (၁၃) နှစ်အရွယ် ကမ္ဘောဒီးယား ကျောင်းသားတစ်ဦး ကို ထိုင်းရဲများက ဖမ်းဆီးပြီးနေရပ်ပြန်ပို့ရန် ပြင်ဆင်နေသည်ဆိုသည့် သတင်းနှင့်အတူ အွန်လိုင်းပေါ်တွင် ဘန်ကောက်မြို့တော်၏ ပညာရေးဆိုင်ရာ အခွင့်အလမ်းနှင့်မူဝါဒများနှင့် ပတ်သက်သည့် ထင်မြင်ချက်များ ပြန့်နှံ့ခဲ့သည်။
ထို့အပြင် နိုင်ငံခြားသား၊ ရွှေ့ပြောင်း ကလေးငယ်များအား လက်ခံသည့် ကျောင်းများနှင့် ဆရာ၊ ဆရာမများအား ခြိမ်းခြောက်မှုများ ရှိလာပြီး၊ ဖမ်းဆီးအရေးယူခံရမူ၊နေရပ်နိုင်ငံများသို့ ပြန်လည် ပို့ဆောင်မှုများနှင့် ကြုံတွေ့နေရသည်။ အဆိုပါအခြေအနေများသည် ဆရာ၊ဆရာမများအား ပူပင်၊သောက နှင့် စိုးရိမ်ကြောက်လန့်မူများဖြစ်စေခဲ့သည်။
ထို့ကြောင့် ဘန်ကောက်မြို့တော် အုပ်ချုပ်ရေးအဖွဲ့၏ အတည်ပြုထားသည့် မူဝါဒများ၊ ရည်ရွယ်ချက်များနှင့်အညီ နိုင်ငံခြားသား ရွှေ့ပြောင်း ကလေးလူငယ်များအား ကျောင်းဝင်ခွင့် လက်ခံနိုင်ကြောင်းနှင့် ကျောင်းများနှင့် ဆရာဆရာမများ စိုးရိမ်ကြောက်လန့်နေကြသည့် အကြောင်းအရာအချက်အလက်များ နှင့် မေးခွန်းများစွာ ဖြေကြားပေးလိုက်ခြင်းဖြစ်သည်။ အထူးသဖြင့် ရွေ့ပြောင်းကလေးငယ်များအား ထိုင်းအစိုးရကျောင်းများအနေနှင့် တရားဝင်လက်ခံနိုင်ကြောင်းကို ဤစာဖြင့် ထပ်လောင်း အတည်ပြုအသိပေးလိုက်ခြင်းဖြစ်သည်။
၁။ ထိုင်းကလေးငယ်များအား ဦးစားပေး ဆောင်ရွက်ရန် – ကျွန်ုပ်တို့၏ ထိုင်းအစိုးရကျောင်းများတွင် ကလေးငယ်များနှင့် လူတိုင်းအတွက် နေရာထိုင်ခင်း အလုံအလောက်ရှိပါသည်။ ဘန်ကောက်မြို့တော် ဧရိယာအတွင်း စုစုပေါင်း စာသင်ကျောင်း (၄၃၇) ကျောင်းရှိပြီး အများစုမှာ မူကြိုနှင့် မူလတန်းကျောင်းများဖြစ်ကာ ကလေး( ၃ဝဝ,ဝဝဝ) ကို လက်ခံထားရှိနိုင်သည်။ လက်ရှိတွင် ကျောင်းသား( ၂၅၆,၇ဝ၃ ) ဦး ရှိပြီး ထိုင်းကလေးတိုင်းအတွက် နေရာအလုံအလောက် ရှိပါသေးသည်။ ထို့အပြင် ကလေးများ၏ ဖွံ့ဖြိုးမှုအမြင့်မားဆုံးနှစ်ဖြစ်သော မွေးကင်းစ မှ အသက် (၅) နှစ် အတွင်း အလေးများအတွက်ပညာရေးစနစ်အတွင်းသို့ပိုမိုမြန်ဆန်စွာပို့ဆောင်နိုင်ရန်ဝင်ခွင့်အသက်သတ်မှတ်ချက်ကို (၃) နှစ်သို့ လျှော့ချရန် မူဝါဒရှိသည်။ လူတိုင်းအတွက် နေရာအလုံအလောက်ရှိပါသေးသည်။
၂။ နိုင်ငံခြားသား၊ ရွှေ့ပြောင်းကလေးများ လက်ခံခြင်း၏ အကျိုးကျေးဇူး – ထိုင်းနိုင်ငံတွင် နေထိုင်သော နိုင်ငံခြားသား၊ ရွှေ့ပြောင်း ကလေးများကို လက်ခံခြင်းသည် ၎င်းတို့အား တရားဝင် ကျောင်းသားအဖြစ် မှတ်ပုံတင်ရပါသည်။ ကလေးတစ်ဦးအား ကျောင်းဝင်ခွင့်ပေးသည့်အခါတိုင်းတွင် ကျောင်းသား မိဘများ ၏ နာမည်၊နေရပ်လိပ်စာ၊ အလုပ်လုပ်ကိုင်ခွင့်၊ နိုင်ငံကူးလက်မှတ်နှင့် အခြားသက်သေခံ စာရွက်စာတမ်းများကို စစ်ဆေး၊လက်ခံရမည်ဖြစ်ပါသည်။ ထိုသို့ မှတ်ပုံတင်ခြင်းဖြင့် နိုင်ငံခြားသား၊ ရွှေ့ပြောင်း မိသားစုများစွာကို ထိုင်းနိုင်ငံက ကျင့်သုံးသတ်မှတ်ထားသည့် ထိုင်းတရားဥပဒေစနစ်အတွင်းသို့ ပို့ဆောင်ပေးနိုင်မည်ဖြစ်သည်။
၃။ ဒုက္ခသည်နှင့် နိုင်ငံမဲ့ကလေးများအတွက် မူဝါဒ – ဒုက္ခသည်များ သို့မဟုတ် နိုင်ငံမဲ့ကလေးလူငယ်များ အများအပြားအတွက် ကျွန်ုပ်တို့သည် ကုလသမဂ္ဂ အပြည်ပြည်ဆိုင်ရာ အရေးပေါ် ကလေးများ ရန်ပုံငွေအဖွဲ့ (United Nations International Children’s Emergency Fund) (UNICEF) နှင့် ပူးပေါင်း၍ “ မည်သည့်ကလေးတစ်ဦးတစ်ယောက်မှ မပါဝင်နိုင်ခြင်း မရှိစေရန်” (Leave No One Behind) မူဝါဒဖြင့် ဆောင်ရွက်လျက်ရှိသည်။ ထိုင်းကလေးများအတွက် ကျောင်းများ၊ နေရာထိုင်ခင်းများနှင့် သင်ကြားရေး အထောက်အကူပြုပစ္စည်းများ အလုံအလောက်ရှိကြောင်းကိုလည်း ထပ်မံအာမခံပါသည်။ ဤပွင့်လင်းမှုသည် ထိုင်းကလေးငယ်များ၏ အရင်းအမြစ်များကို မထိခိုက်စေဘဲ စာသင်ခန်းများဖွင့်လှစ်ရန် ထိရောက်သောနည်းလမ်းတစ်ခုဖြစ်သည်။
၄။ ပညာရေး၏ အရေးပါမှု – လူတိုင်းအား ပညာရေးပေးခြင်းသည် “သူတို့အား ကူညီခြင်း” သာမကဘဲ “ကျွန်ုပ်တို့ကို ကူညီခြင်း” ပင်ဖြစ်သည်။ ကန်းတိုးမြို့ရှိ Mercy Center မှ ဆရာ Prapai က ကလေးများ ကျောင်းတက်သည့်အခါ ရာဇဝတ်မှုများ လျော့နည်းလာကာ လူ့အဖွဲ့အစည်း ပိုမိုအေးချမ်းလာပြီး မိသားစုများ ပိုမိုအားကောင်းလာသည်ဟု ပြောကြားခဲ့ဖူးသည်။ ဤသည်မှာ သူတို့ကို ကူညီရုံသာမက ကျွန်ုပ်တို့ကိုလည်း ကူညီခြင်းဖြစ်ကာ လူ့အဖွဲ့အစည်း တိုးတက်လာသည်နှင့်အမျှ လူတိုင်းလည်း တိုးတက်လာပါသည်။ အနာဂတ် လူမှုရေးပြဿနာများကို ကိုင်တွယ်ဖြေရှင်းရန် ဘဏ္ဍာငွေများ သုံးစွဲရခြင်းထက် ပညာရေးအတွက် အရင်းအမြစ်များ ပံ့ပိုးခြင်းက ရေရှည်တွင် ပိုမိုအကျိုးကျေးဇူးရှိစေပါသည်။
၅။ အထူးလိုအပ်ချက်ရှိသူများအား စောင့်ရှောက်ခြင်း – နိုင်ငံခြားသားကလေးများထက် ယခုအခါတွင် အထူးလိုအပ်ချက်ရှိသူများ (မသန်စွမ်းသူများ) ကိုလည်း ကျွန်ုပ်တို့အနေနှင့် အထူးဂရုစိုက်ဆောင်ရွက်လျက်ရှိသည်။ လက်ရှိတွင် ဘန်ကောက်ဧရိယာအတွင်းရှိ ကျောင်းများတွင် မသန်စွမ်းကလေးငယ်( ၅,ဝဝဝ) ကျော်ရှိပြီး အထူးပညာသင်ကြားရေးကျောင်းများ ပေါင်းထည့်ခြင်း၊ အထူးပညာရေးဒီဂရီဖြင့် ဘွဲ့ရဆရာ ဆရာမများ ခန့်ထားခြင်းနှင့် သင့်လျော်သော ကလေးထိန်းများအတွက် ပံ့ပိုးပေးခြင်းတို့ဖြင့် ပံ့ပိုးကူညီမှုများ တိုးချဲ့ဆောင်ရွက်လျက်ရှိသည်။
၆။ ဥပဒေနှင့် လူ့အခွင့်အရေး – ဤအရာအားလုံးသည် ဥပဒေနှင့် လူ့အခွင့်အရေးမူများအောက်တွင်ရှိသည်။ ၂ဝဝ၅ -ခုနှစ် ဇူလိုင်လ (၅) ရက်နေ့က ထိုင်းအစိုးရဖွဲ့၏ ဆုံးဖြတ်ချက်နှင့် ၂ဝ၁၉- ခုနှစ် အောက်တိုဘာလ(၃၁) ရက်နေ့က ပညာရေးဝန်ကြီးဌာန၏ ကြေညာချက်အရ ထိုင်းနိုင်ငံအတွင်းရှိ ကလေးတိုင်းသည် နိုင်ငံသားမခွဲခြားဘဲ တန်းတူညီမျှစွာ ပညာသင်ယူခွင့်ရှိရမည်ဟု ရှင်းရှင်းလင်းလင်း ဖော်ပြထားသည်။
ပြီးခဲ့သည့် သီတင်းပတ်က ဘန်ကောက်တွင် ထိုင်းအမျိုးသားလူ့အခွင့်အရေး ကော်မရှင်နှင့် ကမ္ဘာကုလသမဂ္ဂတို့ ပူးပေါင်း၍ လူ့အခွင့်အရေး မြို့တော်ဖြစ်လာရန် ရည်ရွယ်ထားကြောင်း ကြေညာချက်ထုတ်ပြန်ခဲ့သေးသည်။ ပညာရေးဆိုင်ရာ အခွင့်အရေးနှင့် ပတ်သက်၍ ကုလသမဂ္ဂနှင့် ထိုင်းအမျိူးသားလူ့အခွင့်အရေးလူ့အခွင့်အရေးကော်မရှင်အား ဘန်ကောက်မြို့ရှိ ကျောင်းများတွင် အခွင့်အရေးအလေးထား ပညာပေးရန်နှင့် လမ်းညွှန်မှုပေးရာတွင် ကူညီပေးရန် ဖိတ်ခေါ်လိုပါသည်။
ဆရာဆရာမများ အနေဖြင့် အဆိုပါအခြေအနေများအား မည်သို့တုံ့ပြန်ရမည်ကို သိရှိနိုင်စေရန်၊ ကျောင်းများတွင် ပဋိပက္ခများ၊ပြသာနာများကို စီမံခန့်ခွဲနိုင်ရန် လမ်းညွှန်ချက်များနှင့် လူတိုင်း ပညာသင်ယူခွင့် ရရှိကြောင်း သေချာ၊ ရှင်းလင်းသိစေရမည်ဖြစ်သည်။
“သူ့တို့ကို ကူညီတာ မဟုတ်ဘူး၊ ငါတို့ကို ကူညီတာ” ဆိုသည့် အသိစိတ်ဖြင့် ဆောင်ရွက်စေလိုပါသည်။ “လူ့အဖွဲ့အစည်း ရှင်သန်ရင် ငါတို့ သားသမီးတွေလည်း ရှင်သန်မယ်” ဟု ဘန်ကောက်မြို့ ဒုတိယ မြို့တော်ဝန် ခွန်စနွန် ဝမ်စံဘွန် (Sanont Wangsangboon) က ၎င်း၏ လူမူကွန်ယက် (Facebook) စာမျက်နှာတွင် အတည်ပြု ပြောကြားခဲ့သည်။
(ထိုင်းနိုင်ငံအခြေစိုက် The Standard News သတင်းဌာနက ရေးသားဖော်ပြထားသော “If society survives, our children will survive” ဆောင်းပါးအား ဆီလျော်အောင် ဘာသာပြန်ဆိုထားခြင်း ဖြစ်သည်။)
ဓာတ်ပုံ – ထိုင်းနိုင်ငံတောင်ပိုင်းရှိ FED/ULC ရွှေ့ပြောင်းကလေးငယ်များ သင်ကြားရေးစင်တာက ကလေးများ။ Photo – Migrant Times
YouTube https://www.youtube.com/@migranttimes
Website https://www.migranttimes.com/
Telegram https://t.me/migranttimes