စက်ရုံအလုပ်သမားသမဂ္ဂဝင်တချို့ကို အလုပ်ရှင်တွေက Black List သွင်းထားလို့ အလုပ်ရှာဖို့ခက်နေ
နိုဝင်ဘာ ၂၉ ရက်၊ Migrant Times
ပြည်တွင်းစက်ရုံတွေက အလုပ်သမားအရေးလှုပ်ရှားနေတဲ့ သမဂ္ဂဝင်တချို့ကို အလုပ်ရှင်ေတွက Black List (အမည်ပျက်စာရင်း)သွင်းထားပြီး တခြားစက်ရုံတွေဆီ ဖြန့်ဝေထားတာကြောင့် အလုပ်အသစ်ရှာဖို့ ခက်ခဲနေတယ်လို့ အဲဒီအလုပ်သမားတွေက ဆိုပါတယ်။
စက်ရုံအတွင်း အလုပ်သမားအခွင့်အရေး တောင်းဆိုလေ့ရှိသူတွေကို အကြောင်းမဲ့အလုပ်ထုတ်ပြီး တခြားမှာလည်းဝင်မလုပ်နိုင်အောင် အဲဒီအလုပ်သမားတွေရဲ့စာရင်းဖြန့်ဝေထားတာတွေ ရှိနေတာလို့ ဆိုပါတယ်။
” အလုပ်သွားလျှောက်ရင် ဘာအကြောင်းပြချက်မှ မပေးဘဲ လက်မခံနိုင်ဘူးဆိုပြီး ငြင်းခံရတာ များနေပြီ။တော်တော်များများ အဲဒီလိုကြုံနေရတာ ” လို့ အလုပ်ရှာနေတဲ့ အလုပ်သမားသမဂ္ဂခေါင်းဆောင်တစ်ဦးက ပြောပါတယ်။
အလုပ်သမားအခွင့်အရေးတောင်းဆိုတတ်သူတှေကို စက်ရုံတွေက မှတ်ထားပြီး အချင်းချင်း ဖြန့်ဝေအသိပေးတာကို ဒီနှစ်အတွင်း ပိုကြုံတွေ့နေရတယ်လို့လည်း အလုပ်သမားအရေးလှုပ်ရှားသူတွေက ဆိုပါတယ်။
” အရင်က ရှိခဲ့တယ်၊ အဲဒီလောက် မဟုတ်ဘူး။ သမဂ္ဂတွေက ပြောနိုင်ဆိုနိုင်တဲ့အချိန်ဆိုတော့ အလုပ်ရှင်တွေ သိပ်မလုပ်ရဲဘူး။ အခုက သူတို့ အလုပ်ရှင်အချင်းချင်း အရမ်းစည်းလုံးတာ။ အလုပ်သမားအခွင့်အရေးတောင်းဆိုဖူးတဲ့သူတွေဆို အင်တာဗျူးတောင် အခေါ်မခံရဘူး ” လို့ ရွှေပြည်သာမြို့နယ်က အလုပ်သမားအရေးလှုပ်ရှားသူတစ်ဦးက ပြောပါတယ်။
အဲဒီလို ခွဲခြားဖိနှိပ်နေတာကြောင့် စက်ရုံအလုပ်သမားတွေဟာ အခွင့်အရေး ချိုးဖောက်ခံရရင် ထုတ်မပြောရဲတော့ဘဲ အလုပ်ရှင်တွေ စိတ်ကြိုက်ခြယ်လှယ်ခွင့် ရနေတယ်လို့လည်း သူတို့က ပြောပါတယ်။
မြန်မာနိုင်ငံက စက်ရုံ၊ အလုပ်ရုံတွေမှာ ၂ နှစ်အတွင်း အလုပ်သမားအခွင့်အရေး ဆုံးရှုံးမှု အဆိုးရွားဆုံး ခံစားနေရပြီး အလုပ်သမားရုံးတွေကိုလည်း အားကိုးလို့ မရဘူးလို့ အလုပ်သမားတွေက ဆိုပါတယ်။
(ပြည်တွင်းစက်ရုံတစ်ခုတွင် အလုပ်သမားအခွင့်အရေးတောင်းဆိုနေသူများကို တွေ့ရစဥ်)
