တောင်ကိုရီးယားရောက်မြန်မာလုပ်သားတစ်ဦး အိပ်နေရင်းကွယ်လွန်
စက်တင်ဘာ ၁၅ ရက်
အရုဏ်ဦး၊ Migrant Times
- တောင်ကိုရီးယားရောက်မြန်မာလုပ်သားတစ်ဦးဟာ စက်တင်ဘာ ၁၄ ရက်ညပိုင်းက အိပ်နေရင်းကွယ်လွန်သွားတယ်လို့ အဲဒီနိုင်ငံရောက်မြန်မာအသိုင်းအဝိုင်းထံကသိရပါတယ်။အသက် ၃၀အရွယ် ကိုရဲထက်အောင်ဟာ ကိုရီးယားနိုင်ငံ ၊ဂယောင်ဂီပြည်နယ်၊ ဟွာဆောင်မြို့၊ အုဂျောင်အွတ်ရှိ နေအိမ်မှာ ကွယ်လွန်ခဲ့တာလို့ဆိုပါတယ်။ကိုရဲထက်အောင်က နောက်နေ့အလုပ်ဆင်းဖို့ အိပ်နေစဉ် ည ၈နာရီ ၃၀ မီနစ်အချိန်မှာ အလုပ်မှ ပြန်လာကြတဲ့ သူငယ်ချင်း တစ်စုက ကိုရဲထက်အောင်ကို လှုပ်နိုးတဲ့အခါ ခန္ဓာကိုယ်က တောင့်နေပြီး နိုးလာခြင်း မရှိတော့တာလို့တောင်ကိုရီးယားရောက်မြန်မာ အလုပ်သမားအရေးကူညီပေးနေတဲ့ ကိုဇော်မျိုးအောင်က ပြောပါတယ်။
- “အခန်းရှိ သူငယ်ချင်း တစ်စုက ၁၁၉ ကို ဖုန်းဆက် အကူအညီ တောင်းခဲ့ရာ မကြာမီိ ဟွာဆောင်ရဲစခန်းမှ ရဲဝန်ထမ်းများ ရောက်လာပြီး ကိုရဲထက်အောင်ရဲ့ သေဆုံးမှုကို စစ်ဆေးကာ ဟွာဆောင် အအေးတိုက်ပို့လိုက်ပါတယ်”လို့ သူ့ ဖေ့ဘွတ်ခ်ကွန်ရက်မှာ အသိပေးထားတာဖြစ်ပါတယ်။ဟွာဆောင် ရဲစခန်း တာဝန်ရှိ ရဲဝန်ထမ်းများက ကိုရဲထက်အောင်၏ ရုပ်အလောင်းကို ထပ်မံစစ်ဆေးပြီး သင်္ဂြိုဟ်ခွင့်ပြုပါက နာရေး အစီအစဉ်ကို ကြေညာပေးမယ်လို့လည်းဆိုပါတယ်။ကွယ်လွန်သူဟာ မန္တလေးတိုင်း၊ မြင်းခြံခရိုင်၊ နွားထိုးကြီးမြို့နယ် ဇာတိကဖြစ်ပြီး ရန်ကုန်မြို့မှာဇနီးနဲ့ ကလေးနှစ်ယောက်ကျန်ခဲ့တယ်လို့သိရပါတယ်။ဒါ့အပြင်ကိုရဲထက်အောင်ဟာ ကိုရီးယားကို ရောက်တာ တစ်နှစ် မပြည့်သေးဘူးလို့လည်း သူနဲ့နီးစပ်သူတွေကပြောပါတယ်။
