ထောက်ပံ့ကြေးတိုးပြီးနောက် အဆောင်နဲ့ကုန်စျေးနှုန်းတက်လို့ အလုပ်သမားတွေပိုကြပ်တည်းလာ
နိုဝင်ဘာ ၃ရက်၊ အရုဏ်ဦး
စက်ရုံလုပ်သားတွေကို ထောက်ပံ့ကြေးတိုးပေးလိုက်ပြီးနောက်မှာ အဆောင်နဲ့ ကုန်စျေးနှုန်းတွေမြင့်တက်ခဲ့လို့ ပိုပြီးကြပ်တည်းမှုတွေ ဖြစ်လာတယ်လို့ လုပ်သားတချို့က ပြောပါတယ်။
စစ်ကောင်စီအလုပ်သမားဝန်ကြီးဌာနက ပြီးခဲ့တဲ့နှစ်ကုန်ပိုင်းနဲ့ စက်တင်ဘာတို့မှာ ထောက်ပံ့ကြေးတစ်ရက် ၁,၀၀၀ ကျပ်စီပေးဖို့ ညွှန်ကြားခဲ့တာဖြစ်ပါတယ်။
အဲဒီလိုထောက်ပံ့ကြေးတိုးပေးခိုင်းပြီးနောက်မှာ အဆောင်နဲ့ အိမ်ငှားခတွေတိုးလာသလို အထွေထွေကုန်စျေးနှုန်းမြင့်တက်မှုပါ ကြုံရတာကြောင့် ရတဲ့ငွေနဲ့မကာမိအောင် ဒုက္ခရောက်ကြရတယ်လို့ စက်ရုံလုပ်သားတွေက ဆိုပါတယ်။
“အဆောင်ခဆိုလည်း တစ်သောင်းလောက်တိုးသွားတယ်။မီတာခတွေတိုးလို့ဆိုပြီးအကြောင်းပြတယ်။အိမ်ငှားခတွေဆိုပိုဆိုးတယ်။ထောက်ပံ့ကြေးရတာနဲ့ ပြန်ကုန်တာမကာမိဘူး။ကုန်စျေးနှုန်းတက်ချက်က စျေးတောင်မယ်ရဲဘူး”လို့ လှိုင်သာယာမြို့နယ်က စက်ရုံလုပ်သားတစ်ဦးက ပြောပါတယ်။
အလုပ်သမားတွေကို တိုးပေးတဲ့ နှစ်ထောင်ကျပ်မှာ ထောက်ပံ့ကြေးခေါင်းစဥ်အောက်မှာရှိနေတာကြောင့် အချိန်ပိုကြေးတွက်ရာမှာ အကျုံးမဝင်လို့ အလုပ်သမားတွေ နစ်နာရတယ်လို့လည်းဆိုပါတယ်။
“စက်ရုံလုပ်သားတွေဘဝက ကြပ်ပြီးရင်းကြပ်တာ။လုပ်နေရင်းကိုငတ်ရတဲ့အခြေအနေမျိုး။တချို့စက်ရုံတွေဆိုထောက်ပံ့ကြေးတောင်အပြည့်မပေးဘူးဆိုတာတွေကြားနေရတယ်”လို့ ပြည်တွင်းအလုပ်သမားအရေးလူပ်ရှားသူတစ်ဦးက ပြောပါတယ်။
အလုပ်သမားတွေအနေနဲ့ ကြပ်တည်းမှုမဖြစ်ရအောင်လုံလောက်တဲ့လုပ်ခရရှိရေးတောင်းဆိုထားပေမယ့် သက်ဆိုင်ရာဝန်ကြီးဌာနနဲ့အလုပ်ရှင်တွေက မျက်ကွယ်ပြုထားကြတယ်လို့သူတို့က ဆိုပါတယ်။
အခုလို ကြပ်တည်းမှုတွေ ရှိနေတာကြောင့် စက်ရုံလုပ်သားတွေအနေနဲ့ ပြည်ပကိုထွက်ဖို့ကိုသာပိုပြီး အားစိုက်နေကြတယ်လို့ အလုပ်သမားတချို့ကဆိုပါတယ်။
အဲဒါကြောင့် ပြည်တွင်းစက်ရုံလုပ်သားတွေအနေနဲ့ လူကုန်ကူးမှုခံရနိုင်တဲ့ ဆိုးရွားတဲ့အခြေအနေမှာရောက်ရှိနေတယ်လို့လည်း အလုပ်သမားအရေးလူပ်ရှားသူတွေက ပြောပါတယ်။
