ထိုင်းမှာ MoU မြန်မာလုပ်သားတွေဆီက ဘဏ်အကောင့်ဝယ်ပြီး တရားမဝင် ငွေလွှဲပြောင်းတာတွေရှိနေ၊ ဘဏ်အကောင့်ပိုင်ရှင် မြန်မာလုပ်သားတစ်ဦး အဖမ်းခံရ
ဖေဖော်ဝါရီ ၈ ရက်၊ Migrant Times
- ထိုင်းနိုင်ငံ၊ နခွန်ပထုံနယ်မြေမှာ အလုပ်လုပ်နေတဲ့ မြန်မာရွှေ့ပြောင်းလုပ်သားတစ်ဦးကို လောင်းကစားအပါအဝင် တရားမဝင်ငွေကြေးလွှဲပြောင်းမှုနဲ့ ထိုင်းနိုင်ငံ အာဏာပိုင်တွေက ဖမ်းဆီးထိန်းသိမ်းထားပါတယ်။ဖမ်းဆီးခံရသူက မြန်မာနိုင်ငံကနေ ထိုင်းကို MoU စနစ်နဲ့လာရောက်ပြီး ငါးသေတ္တာစက်ရုံတစ်ခုမှာ အလုပ်လုပ်ကိုင်နေတာပါ။ သူ ဖွင့်ထားတဲ့ ဘဏ်အကောင့်ကနေ ငွေဝင်ငွေထွက်ပမာဏများပြားပြီး မြန်မြန်ဆန်ဆန် လွှဲပြောင်းမှုတွေရှိနေတာကြောင့် အခုလို ဖမ်းဆီးခံရတာလို့ သိရပါတယ်။
- ကာယကံရှင်ရဲ့ အမျိုးသမီးဖြစ်သူက “ စက်ရုံက ရှမ်းတစ်ယောက်က ဘဏ်အကောင့်တစ်ခုကို ၁၅၀၀ (ဘတ်)နဲ့ဝယ်တယ်။ တခြားသူတွေဆီကလည်း ဝယ်တယ်။ ကျွန်မတို့အချက်အလက်တွေနဲ့ ဘဏ်အကောင့်ဖွင့်ပေးရတာပေါ့။ ခုဖြစ်တာက အဲဒီဝယ်သွားတဲ့ ဘဏ်အကောင့်ကြောင့် ဖမ်းခံရတာ ” လို့ ရှင်းပြပါတယ်။
- အဆိုပါကိစ္စနဲ့ပတ်သက်ပြီး AAC (လက်တွဲကူညီ)ကို အကူအညီတောင်းခံထားပြီး ထိုင်းနိုင်ငံသား ရှေ့နေနဲ့လည်း အမှုလိုက်နေတယ်လို့ သိရပါတယ်။၂၀၂၂ ခုနှစ်၊ ဩဂုတ်လကတည်းက MoU လုပ်သားတွေကို ဘဏ်အကောင့် သုံး၊ လေးခုဖွင့်ခိုင်းတဲ့ ကိစ္စနဲ့ပတ်သက်လို့ မြန်မာရွှေ့ပြောင်းလုပ်သားအရေး ကူညီနေသူတွေက သတိထားကြဖို့နဲ့ မလိုအပ်ဘဲ ဘဏ်အကောင့်တွေ အများကြီးမဖွင့်ကြဖို့၊ လက်လွှဲပြောင်းခြင်းတွေ မလုပ်ကြဖို့ သတိပေးခဲ့ဖူးပါတယ်။
