ထိုင်းနိုင်ငံ ၊ တာ့ခ်ခရိုင်၊ မဲဆောက်မြို့နယ်၊ ထာ့ဆိုင်းလွတ်ရပ်ကွက်ရှိ နေအိမ်တစ်အိမ်တွင်ရှယ်ယာရောင်းဝယ်ရေး စည်းရုံးကာ ငွေကြေးလိမ်လည်သူများနှင့် အလုပ်လုပ်ကိုင်သည့် မြန်မာ ၃ ဦးကိုဖမ်းဆီးပြီး ဘတ် ၄၆ သန်းကျော် သိမ်းဆည်းရရှိခဲ့ကြောင်း ဗဟိုစုံစမ်းစစ်ဆေးရေးဗျူရို (CIB) လက်အောက်ရှိ နည်းပညာဆိုင်ရာ ရာဇဝတ်မှုနှိမ်နင်းရေးဌာန(TCSD)ကထုတ်ပြန်သည်။
မြန်မာနိုင်ငံသားများဖြစ်သည့် အသက် ၅၇ နှစ်အရွယ်ရှိ အမျိုးသားတစ်ဦး ၊ အသက် ၅၇ နှစ်အရွယ်အမျိုးသမီး နှင့် အသက် ၅၄ နှစ်အရွယ်ရှိ အမျိုးသားတို့ကို ဖမ်းဆီးခဲ့ကြောင်း CIB ကထုတ်ပြန်သည်။
CIB ထုတ်ပြန်ချက်အရ ငွေကြေးလိမ်လည်သူများသည် Facebook စာမျက်နှာကို အသုံးပြုကာ ရှယ်ယာရောင်းဝယ်ရေး ရင်းနှီးမြှုပ်နှံမှုအတွက် ဖိတ်ခေါ်ခဲ့ကြသည်။ ထိုမှတစ်ဆင့် အဖွဲ့ဝင်အတုများစွာပါဝင်သည့် Line ဂရုထဲသို့ ဝင်ရောက်ရန် လှည့်ဖြားခဲ့ပြီး အမြတ်အစွန်းရရှိကြောင်းနှင့် ငွေသားများ ထုတ်ယူနိုင်ကြောင်း အသိပေးခဲ့သည်။
ဖိတ်ခေါ်ခံရသူများအား အချက်အလက်များကို ၂-၃ လခန့် လေ့လာစေပြီးနောက် ရင်းနှီးမြှုပ်နှံရန်ဖိတ်ခေါ်ကမ်းလှမ်း ခဲ့သည်။ ထို့နောက် Line ဂရု၏ Admin က VIP အဖွဲ့သို့ ဝင်ခွင့်ပေးကာ Line Official မှတစ်ဆင့် ဆက်သွယ်ခဲ့ပြီး Ulela Max ဟုခေါ်သော အတုအယောင် Application ကို ဒေါင်းလုဒ်ဆွဲခိုင်းခဲ့သည်။
အဆိုပါ ရှယ်ယာရောင်းဝယ်ရေး ရင်းနှီးမြှုပ်နှံမှုမှ ၁ဝ% ခန့် အမြတ်အစွန်းရရှိခဲ့ကြောင်း အသိပေးခဲ့သည်။
VIP အဖွဲ့သို့ ဝင်ခွင့်ရသူများသည် အစပိုင်းတွင် “ကုမ္ပဏီအမည်ဖြင့် ငွေလွှဲလက်ခံပေးသူ” အကောင့်ဖြစ်သော “Ulela Trading 999 Co., Ltd.” သို့ ငွေလွှဲခဲ့ပြီး ငွေထုတ်ယူနိုင်ခဲ့ကြသည်။ ထို့နောက် VIP အဖွဲ့သို့ ဝင်ခွင့်ရသူများသည် ကုမ္ပဏီအမည်ဖြင့် ငွေလွှဲလက်ခံပေးသူ အကောင့် ၄ ခုနှင့် ပုဂ္ဂိုလ်ရေးအမည်ဖြင့် ငွေလွှဲလက်ခံပေးသူ အကောင့် ၈ ခုများအား စုစုပေါင်း ၁၈ ကြိမ်အထိ ဘတ်ငွေသန်း ၂၀ ကျော်ကို အကြိမ်ကြိမ် ငွေထပ်မံလွှဲခဲ့ကြသည်။
ငွေလွှဲသူများသည် ဘတ်ငွေသန်း ၂၀ ကျော်ကို အကြိမ်ကြိမ်လွှဲပြီး နောက်ဆုံးတွင် ငွေထုတ်ယူမရတော့မှန်း သိရှိခဲ့ကြသည်။ ထို့နောက်တွင် လိမ်လည်ခံရကြောင်း ရဲတပ်ဖွဲ့ထံတိုင်ကြားခဲ့ကြသည်။
ငွေကြေးလိမ်လည်သူများသည် ငွေကြေးခဝါချရန်အတွက် Cryptocurrency ငွေလွှဲလမ်းကြောင်းကို အသုံးပြုခဲ့ကြပြီး CIB အရာရှိများ ကစစ်ဆေးရာတွင် ကမ္ဘောဒီးယားနိုင်ငံရှိ Huione Pay ၏ Wallet သို့ လွှဲပြောင်းပေးခဲ့ကြောင်း တွေ့ရှိခဲ့ပြီး အခြားသော Wallet အများအပြားသို့ ဆက်လက်လွှဲပြောင်းပေးခဲ့ကြောင်းသိရသည်။
ထို့နောက် အဆိုပါ ငွေများအား မဲဆောက်တွင် ဖမ်းမိသည့် မြန်မာနိုင်ငံသား ၃ ဦးအား မဲဆောက်မြို့နယ်ရှိ ဘဏ်များမှ ငွေသားထုတ်ယူခိုင်းခဲ့ပြီးနောက် အဆိုပါငွေများကို မြန်မာနိုင်ငံသားတစ်ဦးမှတစ်ဆင့် မြဝတီမြို့ဘက်သို့ နယ်စပ်ဖြတ်ကျော် သယ်ဆောင်ခိုင်းခဲ့ခြင်းဖြစ်ကြောင်း ဗဟိုစုံစမ်းစစ်ဆေးရေးဗျူရို (CIB) ကထုတ်ပြန်သည်။
နည်းပညာဆိုင်ရာ ရာဇဝတ်မှုနှိမ်နင်းရေးဌာန(TCSD)က ဖမ်းမိသူများအား သက်ဆိုင်ရာဌာနသို့ အရေးယူရန်လွှဲပြောင်းထားကြောင်းသိရသည်။
Photo – CIB