ဖူးခက်တွင် ဖွင့်ထားသည့် မြန်မာစားသောက်ဆိုင်ကို ရဲဝင်ဖမ်း
စက်တင်ဘာ ၆ ၊ Migrant Times ။
ထိုင်းနိုင်ငံတောင်ပိုင်း ၊ ဖူးခက်မြို့တွင် ဖွင့်လှစ်ထားသည့် မြန်မာစားသောက်ဆိုင်ကို ဒေသခံများ၏ တိုင်ကြားမှုများကြောင့် ရဲတပ်ဖွဲ့က စက်တင်ဘာလ ၄ ရက်နေ့၌ ဝင်ရောက်ဖမ်းဆီးခဲ့ကြောင်း ထိုင်းသတင်းတွင်ဖော်ပြသည်။
၎င်းဆိုင်သည် မြန်မာနိုင်ငံသားတစ်ဦးက တရားမဝင်ဖွင့်လှစ်ပြီး မြန်မာအလုပ်သမားများသာ ဝန်ထမ်းအဖြစ်ထားရှိကြောင်း သိရသည်။ ဘန်ကောက်ပို့စ် သတင်း၏ ဖော်ပြချက်အရ သူငယ်ချင်းဆိုင် အမည်ရှိ အဆိုပါ စားသောက်ဆိုင်သည် ဖူးခက်မြို့ ဘန်ကောက်လမ်းရှိ ဈေး(၁) နောက်တွင် တည်ရှိသည်။
ဆိုင်၏ဆိုင်းဘုတ်များ၊ မီနူးများ၊ မှာယူမှုစာရွက်များနှင့် ဘောင်ချာများအားလုံးကို မြန်မာဘာသာဖြင့် ရေးထားပြီး ဖောက်သည်အများစုမှာလည်း မြန်မာအသိုင်းအဝိုင်းမှ ဖြစ်ကြောင်း သိရသည်။
ရဲတပ်ဖွဲ့သည် ဆိုင်၏ တာဝန်ခံဖြစ်သော အသက် ၃၇ နှစ်အရွယ် ကိုဇော်မင်းလတ်ကို ဖမ်းဆီးခဲ့ပြီး ၎င်းဆိုင်တွင် ပုံနှိပ်ထားသော အစားအသောက်မီနူးနှစ်ခု၊ မြန်မာဘာသာဖြင့် ရေးထားသော အမှာစာ ၁၄ ခုနှင့် မြန်မာဘာသာဖြင့် ပေးပို့သော ဘောင်ချာများစွာကို တွေ့ရှိခဲ့ကြောင်း ထုတ်ပြန်သည်။
ကိုဇော်မင်းလတ်သည် ထိုင်းဥပဒေအရ နိုင်ငံခြားသားများအတွက် ခွင့်မပြုထားသော အလုပ်အကိုင် လုပ်ကိုင်မှုဖြင့် အရေးယူခံခဲ့ရပြီး တရားစီရင်ရေးလုပ်ငန်းစဉ်များ ဆောင်ရွက်ရန်အတွက် ဖူးခက်မြို့ရဲစခန်းထံ လွှဲပြောင်းထားကြောင်း ထိုင်းသတင်းက ဖော်ပြသည်။
ထိုင်းအလုပ်သမားဥပဒေအရ အစားအသောက်ပြင်ဆင်မှု၊ လမ်းဘေးဈေးရောင်းခြင်းနှင့် လက်လီဝန်ဆောင်မှုများအပါအဝင် အချို့အလုပ်အကိုင်များကို ထိုင်းနိုင်ငံသားများသာ လုပ်ကိုင်ခွင့် ကန့်သတ်ထားသည်။ ယင်းအလုပ်များကို လုပ်ကိုင်သည့် နိုင်ငံခြားသားများသည် ဒဏ်ရိုက်ခံရခြင်း၊ ပြည်နှင်ဒဏ်ခံရခြင်းနှင့် အမည်ပျက်စာရင်းသွင်းခံရခြင်းတို့နှင့် ရင်ဆိုင်ရနိုင်သည်။
ရဲတပ်ဖွဲ့က ဖူးခက်ရှိ စီးပွားရေးလုပ်ငန်းရှင်များကို လူဝင်မှုကြီးကြပ်ရေးနှင့် အလုပ်သမားရေးရာ စည်းမျဉ်းများကို လိုက်နာရန် တိုက်တွန်းထားပြီး ဥပဒေချိုးဖောက်သူများကို ဆက်လက်အရေးယူသွားမည်ဟု သတိပေးထားသည်။
Photo – Bangkok Post
YouTube https://www.youtube.com/@migranttimes
Website https://www.migranttimes.com/
Telegram https://t.me/migranttimes
