တိုက်ပွဲကြောင့် ထိုင်း – မြန်မာ အမှတ်(၁) တံတား ယာယီပိတ်ခဲ့သော်လည်း အခု ပြန်ဖွင့်
တိုက်ပွဲကြောင့် ထိုင်း – မြန်မာ အမှတ်(၁) တံတား ယာယီပိတ်ခဲ့သော်လည်း အခု ပြန်ဖွင့်
မတ်လ ၂၅ ရက်၊ Migrant Times
- မြဝတီ ကုန်သွယ်ရေးဇုန် တိုက်ပွဲကြောင့် မြဝတီ – မဲဆောက် အမှတ် (၁) တံတားကို မြန်မာဘက်အခြမ်းက ယာယီပိတ်ထားခဲ့ပြီး ယခုအခါပြန်လည်ဖွင့်လှစ်ထားပြီဖြစ်တယ်လို့ သိရပါတယ်။ဒီကနေ့ မတ်လ ၂၅ ရက် နံနက်ပိုင်းက KNU/KNLA ပူးပေါင်းတပ်တွေက ကုန်သွယ်ရေးဇုန်မှာရှိနေတဲ့ စစ်တပ်ကို ဝင်ရောက်တိုက်ခိုက်ခဲ့တာဖြစ်ပြီး တိုက်ပွဲပြင်းထန်တယ်လို့ ဒေသခံတွေက သူတို့ရဲ့ လူမှုကွန်ရက် စာမျက်နှာတွေမှာ ဖော်ပြထားကြပါတယ်။
- “ တိုက်ပွဲကြောင့် မနက်က တံတားကို ပိတ်လိုက်သေးတယ်။ ပိတ်တယ်ဆိုတာက ပြည်သူတွေကို မကပ်ခိုင်းတာပေါ့ ဂိတ်တွေချပြီး ပိတ်တာမျိုးတော့ မဟုတ်ဘူး။ အခုတော့ (မွန်းလွဲ ၂ နာရီ) ကား တစ်စီးစ နှစ်စီးစ တံတားကိုဖြတ်တာတွေ့တယ်။ တံတားပြန်ဖွင့်ပြီလို့လည်း သတင်းကြားတယ် ” လို့ မြဝတီဘက်အခြမ်းက အမှတ် (၁) တံတား အနီးမှာ ငွေလဲလုပ်ငန်းလုပ်ကိုင်တဲ့ ကိုမဲလုံးက Migrant Times ကိုပြောပါတယ်။လက်ရှိအနေအထားမှာ တံတားအနီး လုံခြုံရေးအပြည့်ယူထားတယ်လို့ သိရပါတယ်။
