စစ်ကိုင်းမြို့နှင့် မန္တလေးမြို့အနီးတွင် ပြီးခဲ့သည့် မတ်လ ၂၈ ရက်နေ့က လှုပ်ခတ်ခဲ့သည့် ရစ်(ခ်)တာစကေး (၇.၇) အဆင့်ရှိ အင်အားအလွန်ပြင်းထန်သော မြေငလျင်ကြောင့် စစ်ကိုင်း၊ မန္တလေးမြို့တွင် အဆိုးရွားဆုံး ထိခိုက်ပျက်စီးကာ လူသေဆုံးမှုများခဲ့သည်။
ယနေ့ ဧပြီလ ၈ ရက်နေ့ ၊ ငလျင်လှုပ်ခတ်ပြီး ၁၁ ရက်မြောက်ရှိချိန်တွင် နောက်ဆက်တွဲ ငလျင်ငယ်များကြောင့် ထိခိုက်ပျက်စီးမှုများ ဆက်ရှိနေသည်။
ငလျင်ဒဏ်ကြောင့် ဧပြီလ ၇ ရက်နေ့အထိ သေဆုံးသူ (၃၆ဝဝ) ဦး၊ ဒဏ်ရာရရှိသူ (၅ဝ၁၇) ဦး၊ ပျောက်ဆုံးသူ (၁၆ဝ) ဦး ရှိကြောင်း စစ်ကောင်စီက နောက်ဆုံးထုတ်ပြန်သည်။
မိုးလေဝသနှင့်ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရ ယနေ့ ဧပြီလ ၈ ရက်နေ့မှ ၂ ရက်အတွင်း ငလျင်ဒဏ်ထိခိုက်ခဲ့သည့် နေပြည်တော်ခရိုင်နှင့် မန္တလေးတိုင်းဒေသကြီးအပါအဝင် ရန်ကုန်တိုင်းဒေသကြီး၊ ပဲခူးတိုင်း ဒေသကြီး၊ မကွေးတိုင်းဒေသကြီး၊ ဧရာဝတီတိုင်းဒေသကြီး၊ ရခိုင်ပြည်နယ်နှင့် ရှမ်းပြည်နယ်တို့တွင် နေရာစိပ်စိပ် မိုးထစ်ချုန်းရွာနိုင်သည်။
- Migrant Times
