Myanmar Posco သွပ်ပြားစက်ရုံက အလုပ်သမားတွေကိုလစာရဲ့ ၇၀ ရာခိုင်နှုန်းပဲ ထုတ်ပေးနေတယ်လို့ဆို
ဇွန် ၂၂ ရက်
အရုဏ်ဦး၊ Migrant Times
- မင်္ဂလာဒုံမြို့နယ်မှာဖွင့်လှစ်ထားတဲ့ Myanmar Poscoသွပ်ပြားစက်ရုံက အလုပ်သမားတွေကို လစာရဲ့ ၇၀ ရာခိုင်နှုန်းပဲ ထုတ်ပေးနေတယ်လို့ သွေးစည်းညီညွတ်သောသမဂ္ဂများအဖွဲ့ချုပ်(STUM)ထံကသိရပါတယ်။စက်ရုံအနေနဲ့အမြတ်မရှိလို့ဆိုပြီး ၂၀၂၂အောက်တိုဘာလကတည်းက အလုပ်သမားတွေကို လစာအပြည့်မပေးတော့တာလို့ အလုပ်သမားတွေရဲ့ပြောကြားချက်ကိုကိုးကားပြီး STUMက ထုတ်ပြန်ထားတာဖြစ်ပါတယ်။အလုပ်သမားတွေက ခေတ္တ ယာယီ ၊အခိုက်အတန့်အရှုံးပေါ်တာလို့ နားလည်ပြီး စောင့်ဆိုင်းခဲ့ပေမယ့်အခုအချိန်ထိ လစာအပြည့် မပေးဘဲပျက်ကွက်နေတာလို့ဆိုပါတယ်။”အလုပ်ရှင်က အမြတ်ဝေစုကိုအလုပ်သမားတွေကိုမျှဝေပေးရိုးထုံးစံမရှိသလို အလုပ်ရှင်အရှုံးကိုအလုပ်သမားမှ ကျခံဖို့မရှိဘူး။
- စက်ရုံအလုပ်သမားတွေဘက်က အကူအညီတောင်းခံလာလို့ ဆက်လက် ဆောင်ရွက်သွားမယ်”လို့ STUMတာဝန်ရှိသူတစ်ဦးကပြောပါတယ်။အဲဒီစက်ရုံမှာ လုပ်သက်ရင့်ဝန်ထမ်းတွေ ရှိနေပြီးစိတ်ညစ်ကာ မိမိသဘောနဲ့ အလုပ်ထွက်အောင် လုပ်နေတာလို့အလုပ်သမားတွေကယူဆနေကြတယ်လို့ဆိုပါတယ်။Myanmar Posco ဟာ တောင်ကိုရီးယားအခြေစိုက် Posco C&Cကလာရောက်ရင်းနှီးမြုပ်နှံထားတာဖြစ်ပြီး အဲဒီကုမ္ပဏီက အစုရှယ်ယာ ၇၀ ရာခိုင်နှုန်းနဲ့ မြန်မာ့စီးပွားရေးဦးပိုင်လီမီတက် UMEHLက ၃၀ ရာခိုင်နှုန်းပိုင်ဆိုင်တာဖြစ်တယ်လို့ သတင်းတွေအရသိရပါတယ်။
