စက်ရုံတွင်း အလုပ်သမားအခွင့်အရေးချိုးဖောက်ခံရမှုတွေနဲ့ ပတ်သက်လို့ အထက်အဆင့်ဆင့်ကို လိမ်လည်တင်ပြမှုတွေ ရှိနေတယ်လို့ဆို
ဩဂုတ် ၂၂ ရက်
အရုဏ်ဦး၊ Migrant Times
- ပြည်တွင်းက စက်ရုံတွေမှာ အလုပ်သမားအခွင့်အရေးချိုးဖောက်မှုတွေနဲ့ပတ်သက်လို့ ကွင်းဆင်းစစ်ဆေးတဲ့အဖွဲ့တွေကတစ်ဆင့် အထက်အဆင့်ဆင့်ကို သတင်းမှားလိမ်လည်တင်ပြတာတွေရှိနေတယ်လို့ အလုပ်သမားအရေးလှုပ်ရှားသူတွေထံက သိရပါတယ်။အလုပ်သမားအခွင့်အရေးချိုးဖောက်မှုရှိတယ်ဆိုပြီး သတင်းထွက်တဲ့စက်ရုံတွေကို အလုပ်သမားရုံးနဲ့ဆက်စပ် ပူးပေါင်းအဖွဲ့တွေက မြေပြင်သွားရောက်စစ်ဆေးတာတွေရှိပေမယ့် စက်ရုံတွေဘက်က လိမ်လည်တင်ပြချက်တွေကိုသာ ရရှိသွားကြတာလို့ သူတို့က ဆိုပါတယ်။” စစ်ဆေးမေးမြန်းခံရတဲ့ အလုပ်သမားတွေ၊ WCC တွေက စက်ရုံက ရွေးလွှတ်ပေးလိုက်တဲ့သူတွေလေ။ ဘာမေးမေး နဂိုသင်ပေးထားတဲ့အတိုင်း အခွင့်အရေးချိုးဖောက်မှု မရှိပါဘူးဆိုပြီး ဖြေတယ်။ အဲဒါကိုပဲ စစ်ဆေးတဲ့အဖွဲ့တွေကအတည်ယူသွားကြတာ ” လို့ ပြည်တွင်းအခြေစိုက် အလုပ်သမားအဖွဲ့ချုပ်ခေါင်းဆောင်တစ်ဦးက ပြောပါတယ်။
- စစ်ဆေးတဲ့အဖွဲ့တွေအနေနဲ့ကလည်း ဝတ္တရားအရသာသွားရောက်စစ်ဆေးကြပြီး သတင်းဖြစ်ရပ်အမှန်ရရှိဖို့ အားထုတ်တာတွေ ရှိမနေဘူးလို့လည်း အလုပ်သမားအရေးလှုပ်ရှားနေသူတစ်ဦးက ဆိုပါတယ်။”အမှန်ဆိုရင် သူတို့စိတ်ကြိုက်အလုပ်သမားကို ရွေးပြီး လွတ်လွတ်လပ်လပ်မေးမြန်းရမှာ။ အခုက ဝတ်ကျေတန်းကျေမေးပြီး အထက်ကို ပြန်တင်ပြတယ်။ ပြီးရင်အခွင့်အရေးချိုးဖောက်ခံရတယ်ဆိုတာက သတင်းအမှားပါဆိုပြီး သတင်းထုတ်ပြန်တယ် ” လို့ သူက ပြောပါတယ်။စက်ရုံတွေမှာ အလုပ်သမားသမဂ္ဂတွေ လှုပ်ရှားမရအောင်ဖိနှိပ်ခံထားရတာကြောင့် သတင်းအမှန်တင်ပြဖို့အတွက်မှာလည်း အခွင့်အရေးနည်းနေတယ်လို့ သူတို့က ပြောပါတယ်။
- အမှန်တကယ်ချိုးဖောက်မှုရှိနေတယ်ဆိုပြီး ပြောမယ့်အလုပ်သမားဆိုရင်လည်း အလုပ်ကထုတ်ခံရနိုင်တာကြောင့် အရဲစွန့်မပြောရဲတဲ့အခြေအနေဖြစ်တယ်လို့ စက်ရုံလုပ်သားတချို့က ဆိုပါတယ်။လက်ရှိ စက်ရုံတွေမှာ အချိန် ညလုံးပေါက်ဆက်တိုက်စေခိုင်းတာ၊ အချိန်ပိုကြေးအပြည့်မပေးတာ၊ လုပ်အားခ အပြည့်မပေးတာ စတဲ့ပြဿနာတွေအများဆုံးကြုံတွေ့နေရတာလို့လည်း အလုပ်သမားတွေက ပြောပါတယ်။
