နိုဝင်ဘာ ၁၃ ၊ Migrant Times ။
– ထိုင်းနိုင်ငံ ၊ ဘန်ကောက်မြို့၊ ဖရားခနုမ်းမြို့နယ်(Phra Khanong)တွင် နေထိုင်သည့် မြန်မာအမျိုးသမီး ၁ ဦး၏ အခန်းထံမှ ထိုင်းဘတ်ငွေ ၁ဝ သန်း ခိုးယူပြီး ထွက်ပြေးတိန်းရှောင်နေသည့် မြန်မာ ၃ ဦးအား နိုဝင်ဘာလ ၁၂ ရက်နေ့က ဖမ်းဆီးနိုင်ခဲ့ကြောင်း ဘန်ကောက် မြို့တော် ရဲတပ်ဖွဲ့ကထုတ်ပြန်သည်။
– ထိုင်နိုင်ငံ ၊ စမွတ်ဆာခွန်ပြည်နယ် ၊ ခုတ်ခမ်မြို့နယ်ခွဲတွင် အသက် ၁၈ နှစ်အရွယ်မြန်မာနိုင်ငံသား ဆယ်ကျော်သက် လူငယ် ၁ ဦးအား မက်တမ်ဖက်တမင်း (ယာဘ) ၁,၀၀၀ ပြားရောင်းချမှုဖြင့် ရဲတပ်ဖွဲ့က နိုဝင်ဘာလ ၁၂ ရက်နေ့တွင် ဖမ်းဆီးခဲ့ကြောင်း ထိုင်းသတင်းကဖော်ပြသည်။ ၎င်းသည် Noom Wan အမည်ဖြင့် ဖေ့စ်ဘွတ်ခ်အသုံးပြုကာ လူသိများသူဖြစ်ကြောင်း ရဲတပ်ဖွဲ့က ထုတ်ပြန်သည်။
– ထိုင်းနိုင်ငံတွင်းသို့ Free Visa(ဗီဇာကင်းလွတ်ခွင့်) ဖြင့် ၂ ကြိမ်ထက်ပိုပြီးဝင်ရောက်လာသူများကို လူဝင်မှုကြီးကြပ်ရေးမှ ငြင်းပယ်မည်ဖြစ်ပြီး မှန်ကန်သော ဗီဇာလျှောက်ထားပြီးမှသာ ဝင်ရောက်ခွင့်ပေးဖြစ်ကြောင်း ထိုင်းလူဝင်မှုကြီးကြပ်ရေးဌာနမှ ထုတ်ပြန်သည်။ ထိုင်းနိုင်ငံမှ ပြန်လည်ပို့ဆောင်ခြင်းခံရပြီး မှတ်တမ်းတင်ခံထားသူများသည် ထိုင်းနိုင်ငံသို့ ထပ်မံဝင်ရောက်လာပါက ခြွင်းချက်မရှိ ဝင်ရောက်ခွင့် ငြင်းပယ်ခြင်း ခံရမည်ဖြစ်ကြောင်း ၊ထိုင်းတွင် သတ်မှတ်ထားသည့်ရက်ထက် ကျော်လွန်၍ နေထိုင်သူ (overstay) နိုင်ငံခြားသားများအား ဖမ်းဆီးရှင်းလင်းရေး ပြုလုပ်ရန် မည်ဖြစ်ကြောင်းထုတ်ပြန်သည်။
– ထိုင်းနိုင်ငံ၊စမူပကန်ခရိုင်၊ဘန်ပါရပ်ကွက်ရှိ စားသောက်ကုန်စက်ရုံတွင် အလုပ်လုပ်နေကြသော မြန်မာ အလုပ်သမား ၁၆၉ ဦးအား စက်ရုံမှအလုပ်ထုတ်ခဲ့သည့်အတွက် နစ်နာကြေးရရန် ကူညီမှုပေးနေကြောင်း WAG အဖွဲ့ကထုတ်ပြန်သည်။ ထိုအလုပ်သမားများသည် ၄င်းစက်ရုံတွင်အလုပ်လုပ်နေသည်မှာ ၁ နှစ်မှ ၆ နှစ်အထိ သက်တမ်းရှိကြပြီး လုပ်အားခ ၁၆၉ ဦးစာ ၇၅၄,၄၁၆ ဘတ်နှင့် အချိန်ပိုကြေး ၁၆၉ ဦးစာ ၁၅၈,၀၀၀ ဘတ်ရရန်ကျန်သေးကြောင်း WAG အဖွဲ့ကထုတ်ပြန်သည်။
– ထိုင်းနိုင်ငံ ၊ ဘန်ကောက်မြို့တွင် ဖုန်မှုန့်ပမာဏသည် ပျမ်းမျှထက် ကျော်လွန်နေပြီး ဘန်နာခရိုင်၌ အဆိုးဆုံးဖြစ်ကာ ကျန်းမာရေးထိခိုက်နိုင်ကြောင်း ဘန်ကောက်မြို့အုပ်ချုပ်ရေးအဖွဲ့ (BMA) ကထုတ်ပြန်သည်။ လေထုအရည်အသွေး တိုင်းတာချက်များအရ ဘန်ကောက် နေရာများစွာတွင် ဖုန်မှုန့်ပမာဏသည် ပျမ်းမျှထက် ကျော်လွန်နေသည်ကို တွေ့ရှိရပြီး ပြည်သူများအနေဖြင့် အိမ်မှမထွက်ခွာမီ လေထုအရည်အသွေး အချက်အလက်များကို Air BKK application သို့မဟုတ် www.airbkk.com မှတစ်ဆင့် စစ်ဆေးရန် အသိပေးထားသည်။
