ဂျပန်နိုင်ငံကို သွားမယ့်အလုပ်သမားတွေ ရပိုင်ခွင့်တွေနဲ့ ဥပဒေကို နားလည်ဖို့လို
ဂျပန်နိုင်ငံကို သွားမယ့်အလုပ်သမားတွေ ရပိုင်ခွင့်တွေနဲ့ ဥပဒေကို နားလည်ဖို့လို
မတ် ၁၆ ရက်၊ Migrant Times
- ဂျပန်နိုင်ငံ၊ တိုကျိုမြို့မှာရှိတဲ့ မြန်မာသံရုံးက အလုပ်သမား ၈၀၀ ခေါ်ယူမယ့် အလုပ်ကမ်းလှမ်းစာ ၂၀၆ ခုကို ထပ်မံအတည်ပြုလိုက်ပြီဖြစ်ပြီး သွားရောက်မယ့် အလုပ်သမားတွေ အနေနဲ့ ဥပဒေတွေကို လိုက်နာ နားလည်ဖို့လိုတယ်လို့ ဂျပန်ကိုအလုပ်သမားပို့နေတဲ့ အေဂျင်စီတွေက ဆိုပါတယ်။“ သူများနိုင်ငံကို အလုပ်သွားလုပ်တော့မယ်ဆိုရင် သတ်မှတ်ထားတဲ့ စည်းကမ်းဥပဒေတွေကို လိုက်နာဖို့လိုပါတယ်။ အခုက ထွက်ပြေးတာတွေ၊ စည်းကမ်းမလိုက်နာတွေရှိနေတယ်။ သူတို့ရှေ့ကလူတွေက အဲ့လိုလုပ်နေရင် နောက်ကနေသွားရမယ့်သူတွေက မလိုအပ်ပဲ ပိုကြပ်ခံရတယ်။ တချို့အလုပ်တွေဆို မြန်မာဆိုရင် မခေါ်တော့ဘူးဆိုတာမျိုးတွေဖြစ်လာတယ် ” လို့ ဂျပန်ကို အလုပ်သမားပို့ဆောင်နေတဲ့ အေဂျင်စီတစ်ခုရဲ့ ပိုင်ရှင်က ပြောပါတယ်။
- ထို့အတူ အလုပ်သမားတွေကိုလည်း အေဂျင်စီတွေဘက်က သွားရောက်လုပ်ကိုင်ရမယ့် အလုပ်အကိုင်အကြောင်းနဲ့ စည်းကမ်းတွေ၊ ဥပဒေတွေ၊ ရပိုင်ခွင့်တွေကို သင်ကြားကာကွယ် ပေးသင့်တယ်လို့ သူကဆက်ပြောပါတယ်။ဂျပန်နိုင်ငံကို အများအားဖြင့် စိုက်ပျိုးရေး၊ သက်ကြီးရွယ်အို ပြုစုစောင့်ရှောက်ရေး၊ ဆောက်လုပ်ရေး၊ စားသောက်ကုန်လုပ်ငန်းတွေက မြန်မာနိုင်ငံသား အလုပ်သမားတွေကို ခေါ်ယူကြပြီး ဒီအလုပ်တွေကို အလုပ်သင်အလုပ်သမားအနေနဲ့ သွားရောက်ကြသူတွေဟာ မကြာခဏ လုပ်ငန်းခွင်က ထွက်ပြေးတာတွေ ရှိနေတာပါ။
- “ တချို့အေဂျင်စီတွေက လုပ်ငန်းခွင်မှာ ကြုံနေရတာတွေကို မဖြေရှင်းပေးတဲ့အခါ အလုပ်သမားက ထွက်ပြေးတဲ့နည်းနဲ့ ဖြေရှင်းရတာတွေရှိတယ်။ တချို့ကကျ တမင်ကိုထွက်ပြေးတာ။ ဘာကြောင့်ပဲဖြစ်ဖြစ် ရှေ့လူတွေကအဲ့လိုလုပ်ရင် နောက်လာတဲ့သူတွေက ခံရတာပဲ။ သူတို့လူမျိုးတွေက အလုပ်မမြဲဘူးဆိုတာမျိုး တံဆိပ်ကပ်ခံရတာတော့ မကောင်းဘူးပေါ့ ” ဂျပန်မှာ အလုပ်လုပ်နေတဲ့ မချယ်ရီသင်းက Migrant Times ကိုပြောပါတယ်။
- သူက ဒီလိုမျိုးထွက်ပြေးရခြင်း အကြောင်းရင်းတွေ အများကြီးရှိပြီး ဂျပန်နိုင်ငံမှာ အလုပ်လာလုပ်နိုင်ဖို့အတွက် ကုန်ကျစရိတ်မြင့်မားပြီး အလုပ်ကပြန်ရတဲ့ လခက တစ်ကိုယ်ရည်စာအတွက်ပဲ လုံလောက်တာ၊ အိမ်ကိုပြန်မထောက်ပံ့နိုင်တာ၊ အများစုက အလုပ်ပင်ပန်းမှုကို မခံနိုင်တာ၊ လုပ်ရတာနဲ့ ရတဲ့လခနဲ့ မမျှဘူးဖြစ်လာတာ၊ လုပ်ငန်းခွင်ဖိနှိပ်မှုတွေရှိတာတွေကို အေဂျင်စီက မကာကွယ်ပေးတာ၊ ကိုယ်တိုင်ကလည်း ဥပဒေကို နားမလည်တာ စတာတွေကြောင့်ဖြစ်တယ်လို့ ရှင်းပြပါတယ်။
