EPS-TOPIK နဲ့ Skills Test အောင်မြင်ထားသူတွေ လပိုင်းအတွင်းအလုပ်လျှောက်လွှာခေါ်ယူတော့မယ်လို့ POEA ပြော
ဒီဇင်ဘာ ၁၅ရက်၊ Migrant Time
၂၀၂၄ခုနှစ် ကိုရီးယားဘာသာအရည်ချင်းစစ်မေးပွဲ (EPS- TOPIK)နဲ့ Skills Test (ကုန်ထုတ်လုပ်ငန်း ပထမအသုတ်နှင့် ဝန်ဆောင်မှုလုပ်ငန်းအုပ်စု – ၁) အောင်မြင်ထားသူတွေကို လပိုင်းအတွင်း အလုပ်လျှောက်လွှာ ခေါ်ယူတော့မယ်လို့ အစိုးရပြည်ပအလုပ်အကိုင်အေဂျင်စီ (POEA- EPS)က အသိပေးပြောဆိုလာပါတယ်။
အလုပ်လျှောက်လွှာတွေကို ၂၀၂၄ ခုနှစ်၊ ဒီဇင်ဘာနောက်ဆုံးရက် သတ္တပတ်အတွင်း ခေါ်ယူဖို့ လုပ်ဆောင်နေပြီး အဲ့ဒီအချိန်အတွင်း မခေါ်ယူဖြစ်ပါက ၂၀၂၅ ခုနှစ်၊ ဇန်နဝါရီလဆန်းပိုင်းမှာ ခေါ်ယူနိုင်အောင် ဆောင်ရွက်သွား မှာ ဖြစ်တယ်လို့ ဆိုပါတယ်။
စာမေးပွဲအောင်မြင်ထားသူတွေကိုလည်း ကျန်းမာရေး ဂရုပြုကြဖို့နဲ့ နိုင်ငံကူး လက်မှတ် သက်တမ်းအနည်းဆုံး (၁)နှစ်အထက်ရှိကြဖို့အတွက်ကိုလည်း POEA- EPS တိုက်တွန်း အသိပေးပြောဆိုထားပါသေးတယ်။
ကုန်ထုတ်လုပ်ငန်း ပထမအသုတ်မှာ လူဦးရေ (၅၃၀၀)ကျော် အောင်မြင်ထားပြီး ဝန်ဆောင်မှု လုပ်ငန်း အုပ်စု – ၁ မှာ (၇၁) ဦး အောင်မြင်ထားတယ်လို့ သိရပါတယ်။
ဒုတိယအသုတ် အရည်ချင်းစစ်စာမေးပွဲကို ၂၀၂၅ ခုနှစ် နှစ်ဆန်းပိုင်းအတွင်း ဖြေဆိုကြရမှာ ဖြစ်ပြီး HRD-Korea က အချိန်ဇယားပေးပို့လာရင် အသိပေးကြေညာပေးသွားမယ်လို့ POEA-EPS က ပြောပါတယ်။
