စက်တင်ဘာ ၂၆ ၊ Migrant Times ။
ထိုင်းနိုင်ငံ ၊ ချွန်ဘူရီခရိုင်၊ဘန်းလမူးမြို့ရှိ Soi Pattaya 13/2 အဝင်ပေါက် အနီးရှိ ပတ္တာယားကမ်းခြေတွင် မြန်မာနိုင်ငံသား ၁ ဦး ရေနစ်သေဆုံးခဲ့ကြောင်း ရွှေ့ပြောင်းလုပ်သားများ အခွင့်အရေးနှင့် ဖွံဖြိုးတိုးတက်ရေးကွန်ရက်မှထုတ်ပြန်သည်။
ယမန်နေ့ စက်တင်ဘာလ ၂၅ ရက်နေ့ ည ၁ဝ နာရီအချိန်တွင် ရဲတပ်ဖွဲ့ကသတင်းအရ သွားရောက်စစ်ဆေးရာ အသက် ၃၄ နှစ်အရွယ် မြန်မာနိုင်ငံသား မောင်မြတ်ထက်သူ၏ အလောင်းကိုရေထဲတွင်တွေ့ရှိခဲ့ပြီး သေဆုံးနေသည်မှာ အနည်းဆုံး နှစ်နာရီခန့်ရှိကြောင်းသိရသည်။
သေဆုံးသူသည် သူငယ်ချင်းအုပ်စုနှင့် အရက်သောက်ခဲ့ပြီး အရက်မူးပြီး ပင်လယ်ထဲတွင် ရေကူးချိန်ရေနစ်သေဆုံးခဲ့ခြင်းဖြစ်ကြောင်း မျက်မြင်သက်သေများက ပြောသည်။
တာဝန်ရှိသူများကလည်း သေဆုံးသူထံတွင် ဒဏ်ရာ သို့မဟုတ် ရိုက်နှက်ထိုးကြိတ်သည့် လက္ခဏာများ မတွေ့ရှိသည့်အတွက် ရေနစ်သေဆုံးသည်ဟု ကနဦး ယူဆထားသည်။ သေဆုံးရခြင်းအကြောင်းရင်းမှန်ကို သိရှိနိုင်ရန် အလောင်းကို မှုခင်းဆေးရုံသို့ ခွဲစိပ်စစ်ဆေးရန် ပို့ဆောင်ထားကြောင်းသိရသည်။
