ငလျင်ကြောင့် သေဆုံးသူ ၃၅ဝဝ နီးပါးရှိလာ
စစ်ကိုင်းမြို့နှင့် မန္တလေးမြို့အနီးတွင် ပြီးခဲ့သည့် မတ်လ ၂၈ ရက်နေ့က လှုပ်ခတ်ခဲ့သည့် ရစ်(ခ်)တာစကေး (၇.၇) အဆင့်ရှိ အင်အားအလွန်ပြင်းထန်သော မြေငလျင်ကြောင့် စစ်ကိုင်း၊ မန္တလေးမြို့တွင် အဆိုးရွားဆုံး ထိခိုက်ပျက်စီးကာ လူသေဆုံးမှုများခဲ့သည်။
ယနေ့ ဧပြီလ ၆ ရက်နေ့ ၊ ငလျင်လှုပ်ခတ်ပြီး ၉ ရက်မြောက်ရှိချိန်တွင် နောက်ဆက်တွဲ ငလျင်ငယ်များကြောင့် ထိခိုက်ပျက်စီးမှုများ အပြီးသတ် ရှင်းလင်းနိုင်ခြင်းမရှိသေးပဲ အပျက်အစီးများ အောက်တွင် လူသေဆုံးမှုများ ဆက်ရှိနေသည်။
ဧပြီလ ၅ ရက်နေ့ ညမှစတင်ကာ ငလျင်ဒဏ်ထိခိုက်မှုများခဲ့သည့် စစ်ကိုင်း၊ မန္တလေးမြို့နယ်များတွင် ယနေ့ နံနက်အထိ မိုးသည်းထန်နေသည့်အတွက် လမ်းပေါ်ထွက်နေထိုင်နေကြ
ရသည့် ငလျင်းဒုက္ခသည်များ အခက်အခဲကြုံနေပြီး ကယ်ဆယ်ရေးလုပ်ငန်းများ နှေင့်နှေးနေသည်။
မိုးလေဝသနှင့်ဇလဗေဒညွှန်ကြားမှုဦးစီးဌာန၏ တရားဝင်ထုတ်ပြန်ချက်အရ မတ်လ ၂၈ ရက်နေ့တွင် အင်အားအလွန်ပြင်းထန်သော မြေငလျင်လှုပ်ခတ်ပြီးနောက်မှ ဧပြီလ ၆ ရက်နေ့ နံနက်ပိုင်း အထိ နောက်ဆက်တွဲငလျင် ၈၉ ကြိမ်လှုပ်ခတ်ခဲ့သည်။
ငလျင်ဒဏ်ကြောင့် တိုင်းဒေသကြီးနှင့်ပြည်နယ် (၆)ခုတွင် ဧပြီ (၅) ရက်နေ့အထိ သေဆုံးသူ ၃,၄၇၁ ဦး၊ ထိခိုက်ဒဏ်ရာရရှိသူ ၄,၆၇၁ ဦးနှင့် ပျောက်ဆုံးသူ ၂၁၄ ဦး ရှိပြီဖြစ်ကြောင်း စစ်ကောင်စီကထုတ်ပြန်သည်။
- Migrant Times
Photo – Thiha Htun Zaw
( မန္တလေးမြို့တွင် ဧပြီလ ၅ ရက်နေ့ည မိုးသည်းထန်မှုမြင်ကွင်း။)
