အလုပ်သမား သတင်း

နိုဝင်ဘာ ၂၀ ရက်၊ Migrant Times ထိုင်းနိုင်ငံ၊ တာ့ခ်ခရိုင်မှာ ဒီနေ့ မနက်အစောပိုင်းက မြန်မာနိုင်ငံသား ၉ ဦး ဖမ်းဆီးခံခဲ့ရတယ်လို့ သိရပါတယ်။ အမျိုးသား ၂ ဦး၊ အမျိုးသမီး ၅ ဦးနဲ့ ကလေးငယ် ၂ ဦးအပါအဝင် ၉ ဦးဟာ ထိုင်းနိုင်ငံမှာ အလုပ်လုပ်ဖို့ တရားမဝင်နည်းလမ်းနဲ့ ဝင်ရောက်လာတာဖြစ်ပြီး ဒီနေ့မနက် ၄ နာရီလောက်မှာ တာ့ခ်ခရိုင် နယ်စပ်မှာ သူတို့ကို ဖမ်းမိခဲ့တာပါ။ အမျိုးသားတစ်ဦးဆီမှာ မက်သာဖီတမင်းဆေး ၁၄ ပြားကိုလည်း တွေ့ရှိခဲ့တယ်လို့ သိရပါတယ်။ ကိုးကား၊ ဓာတ်ပုံ- Khaosod

နိုဝင်ဘာ ၂၀၊ မောင်နေ့သစ်၊ Migrant Times ထိုင်းနိုင်ငံ ဘန်လန်းခရိုင်အတွင်းမှာ ဒီကနေ့ နိုဝင်ဘာ၂၀ရက်နံနက်က မြန်မာနိုင်ငံသားတွေတင်ဆောင်လာတဲ့ ကားတစ်စီးတိမ်းမှောက်ခဲ့ပြီး လူ ၇ဦးသေဆုံးခဲ့ပါတယ်။ ကားမောင်သမားဟာ ဘန်လန်းခရိုင်၊ ဘန့်ပလာရဲစစ်ဆေးရေးဂိတ်မှာ အမြန်မောင်းနှင်ထွက်ပြေးခဲ့တာကြောင့် လမ်းကွေ့မှာ အရှိန်မထိန်းနိုင်ဘဲ လမ်းဘေးက လျှစ်စစ်မီးတိုက်ကို ဝင်တိုက်ခဲ့ပြီး ရေမြောင်းအတွင်း ပြုတ်ကျခဲ့တာဖြစ်ပါတယ်။ သေဆုံးသူအားလုံးဟာ မြန်မာနိုင်ငံသားတွေဖြစ်ပြီး အမျိုးသား ၂ဦးနှင့် အမျိုးသမီး ၅ဦး စုစုပေါင်း ၇ဦး သေဆုံးခဲ့ပါတယ်။ ထိုင်းကယ်ဆယ်ရေးအဖွဲ့က သေဆုံးသွားတဲ့မြန်မာနိုင်ငံသား ၇ဦးရဲ့ အလောင်းတွေကို နခွန်ပတုန်ခရိုင်အတွင်းက ဆေးရုံသို့ပို့ဆောင်ခဲ့ပြီး ဖြစ်စဥ်နဲ့ပတ်သက်လို့ ဆက်လက်အရေးယူနိုင်ဖို့ရဲတပ်ဖွဲ့က ဆောင်ရွက်နေတယ်လို့လည်း သိရပါတယ်။ ကိုးကားသတင်း- Khaosod

နိုဝင်ဘာ ၁၉ရက်၊အရုဏ်ဦး ပြည်ပအလုပ်အကိုင်အေဂျင်စီအရေအတွက်မှာ ၅၉၈ ခုအထိရှိလာပြီး တစ်ဝက်လောက်က အလုပ်သမားပုံမှန်မပို့နိုင်ကြဘူးလို့ အဲဒီလုပ်ငန်းအသိုင်းဝိုင်းဆီက သိရပါတယ်။ ပြည်ပအလုပ်အကိုင်အေဂျင်စီအသစ်ဖွင့်လှစ်လုပ်ကိုင်တာတွေမှာ ဒီဖက်နှစ်ပိုင်းအတွင်းတရှိန်ထိုးများလာပေမယ့် ပြည်ပအလုပ်အကိုင်စျေးကွက်ကတော့ သိသိသာသာတိုးမလာဘူးလို့ ဆိုပါတယ်။ “အဆက်အသွယ်၊အချိတ်အဆက်များတဲ့အေဂျင်စီဟောင်းတွေတောင် ဒီကာလမှာ မနည်းရုန်းကန်နေရတာ။တစ်လအတွင်းအလုပ်သမားတစ်ယောက်မှမပို့နိူင်တဲ့အေဂျင်စီတွေတောင်ရှိတယ်”လို့ ပြည်ပအလုပ်အကိုင်အေဂျင်စီလုပ်ငန်းရှင်တစ်ဦးက ပြောပါတယ်။ ပြည်ပအလုပ်အကိုင်အေဂျင်စီအသစ်ဖွင့်လှစ်မှုအနေနဲ့ နိုဝင်ဘာလဝက်အတွင်း ၂ခုတိုးလာပြီး အောက်တိုဘာလက ၁၀တိုးလာတာဖြစ်ပါတယ်။ အဲဒီအေဂျင်စီတွေမှာ ထိုင်းနိုင်ငံကိုအဓိကထားလုပ်သားစေလွှတ်ပေးနေပြီး ဂျပန်၊စင်ကာပူနဲ့အရှေ့အလယ်ပိုင်းနိုင်ငံတွေဆီလည်း ပို့ဆောင်ပေးနေတာ ဖြစ်ပါတယ်။ “မလေးရှားက ပိတ်ထားတော့ လုပ်ရတာကျပ်သွားတယ်။ထိုင်းစျေးကွက်မှာ သွားစုနေရတဲ့သဘောဖြစ်နေတယ်။လာအိုလို အလုပ်သမားစျေးကွက်အသစ်တွေပေါ်လာပေမယ့် သိပ်ပြီးအလုပ်မဖြစ်သေးဘူး”လို့ အေဂျင်စီလုပ်ငန်းနဲ့နီးစပ်သူတစ်ဦးက ပြောပါတယ်။ အဲဒီအေဂျင်စီတွေကတဆင့် လစဥ်ပြည်ပကိုအလုပ်သမား ၁၀၀၀၀ နီးပါးစေလွှတ်နေတယ်လို့လည်း မှတ်တမ်းတွေအရသိရပါတယ်။ လက်ရှိမှာ ပြည်ပအလုပ်အကိုင်အေဂျင်စီတွေအနေနဲ့အလုပ်သမားညွန်ကြားရေးဦးစီးဌာနဆီလစဥ်စေလွှတ်တဲ့အလုပ်သမားစာရင်းပေးပို့နေရပြီး စာရင်းပေးဖို့ပျက်ကွက်တဲ့ အေဂျင်စီတွေကိုအရေးယူနေတာရှိပါတယ်။

နိုဝင်ဘာ ၁၉ ရက်၊ Migrant Times ထိုင်းနိုင်ငံတောင်ပိုင်းက ကျွန်းတစ်ခုမှာ မြန်မာနိုင်ငံက ရိုဟင်ဂျာလို့ ယူဆရသူ ကလေးငယ် ၃၀ဦး အပါအဝင်၇၀ဦးကို ထိုင်းအာဏာပိုင်တွေက ဖမ်းဆီးမိထားတယ်လို့ နိုဝင်ဘာလ ၁၆ ရက် ဘန်ကောက်ပို့စ်သတင်းမှာ ဖော်ပြပါတယ်။ သူတို့ကို စစ်ဆေးမေးမြန်းရာမှာ မြန်မာနိုင်ငံက လာတဲ့ မူဆလင်တွေဖြစ်ပြီး ထိုင်းကတစ်ဆင့် မလေးရှားနဲ့ အင်ဒိုနီးရှားကို သွားဖို့ လာကြတာလို့ ဖြေတယ်လို့ ဖန်ငရဲအရာရှိက ပြောပါတယ်။ ဖန်ငမြို့တော်၀န်ကတော့ သူတို့ဟာ ထိုင်းနိုင်ငံထဲ တရားမဝင် ဝင်ရောက်လာသူတွေဖြစ်ပေမယ့် မြန်မာနိုင်ငံက လာတဲ့ ရိုဟင်ဂျာ ဟုတ်၊ မဟုတ် စစ်ဆေးနေဆဲဖြစ်တယ်လို့ ဆိုပါတယ်။ သူတို့နဲ့ ပါလာတဲ့ ကလေးငယ်တွေကို လူမှုဖွံ့ဖြိုးတိုးတက်ရေးနှင့် လူမှုဖူလုံရေးဌာနမှာ စောင့်ရှောက်ထားတယ်လို့ မြို့တော်ဝန်က ပြောပါတယ်။ ကိုးကား၊ ဓာတ်ပုံ-

နိုဝင်ဘာ ၁၈ ရက်၊ Migrant Times ထိုင်း-မြန်မာနယ်စပ် မဲဆောက်မြို့မှာ (၁၈)ဘီးကုန်တင်ကားအောက်ပိုင်းကနေ လိုက်ပါလာတဲ့ မြန်မာ ၈ ဦးကို နိုဝင်ဘာလ ၁၆ ရက်က ထိုင်းအာဏာပိုင်တွေက ဖမ်းဆီးမိခဲ့ပါတယ်။ ထိုင်းစစ်တပ်၊ ရဲနဲ့ အုပ်ချုပ်ရေးအရာရှိတွေ ပါဝင်တဲ့ပူးပေါင်းအဖွဲ့က တာ့ခ်ခရိုင်အတွင်း တရားမဝင် ဝင်ရောက်လာသူတွေကို ရှာဖွေဖမ်းဆီးခဲ့ရာကနေ အခုလို တရားမဝင်နည်းလမ်းနဲ့ ထိုင်းနိုင်ငံထဲ ဝင်လာတဲ့ မြန်မာ ၈ ဦးကို ဖမ်းဆီးမိခဲ့တာဖြစ်ပါတယ်။ ထိုင်းနိုင်ငံသားတစ်ဦးမောင်းနှင်လာတဲ့ ကုန်တင်ကားအောက်ပိုင်းမှာ တပ်ဆင်ထားတဲ့ သစ်သားအံဝှက်ထဲမှာ မြန်မာနိုင်ငံသား အမျိုးသား ၆ ဦး၊ အမျိုးသမီး ၂ ဦးကို တင်ဆောင်လာတာဖြစ်ပါတယ်။ အဲဒီကုန်တင်ကားကို သိမ်းဆည်းထားပြီး ထိုင်းလူမျိုးကားမောင်းသမားနဲ့ မြန်မာ ၈ ဦးကို မဲဆောက်ရဲစခန်းမှာ ဖမ်းဆီးထားတယ်လို့ သိရပါတယ်။ ကိုးကား၊

နိုဝင်ဘာ ၁၇၊ အရုဏ်ဦး ပြည်ပအလုပ်အကိုင်အေဂျင်စီတချို့အနေနဲ့ ဘရူနိုင်းနိုင်ငံကို လုပ်သားစေလွှတ်နိုင်မယ့်စျေးကွက်အသစ်တွေ ရှာဖွေလာကြတယ်လို့ အဲဒီလုပ်ငန်းအသိုင်းဝိုင်းဆီက သိရပါတယ်။ မြန်မာလုပ်သားတွေကို လာအိုနိုင်ငံဆီ အေဂျင်စီတွေက လုပ်သားစေလွှတ်မှုများလာသလို နောက်ထပ်စျေးကွက်အသစ်အနေနဲ့ ဘရူနိုင်းနိုင်ငံဖက်ခြေလှမ်းလာတာဖြစ်တယ်လို့ ဆိုပါတယ်။ “ဘရူနိုင်းကိုတော့ စပို့တဲ့သူတွေကပို့နေပြီ။ နောက်ထပ်လုပ်သားတိုးပို့နိုင်ဖို့ ကုမ္ပဏီတွေနဲ့ချိတ်ဆက်တာမျိုးတွေလုပ်နေတာရှိတယ်။ ခိုင်မာတဲ့လုပ်သားစေလွှတ်နိုင်မယ့် နေရာတခုဖြစ်လာမလားဆိုတာမပြောနိူင်သေးဘူး”လို့ ပြည်ပအလုပ်အကိုင်အေဂျင်စီလုပ်ငန်းရှင်တစ်ဦးက ပြောပါတယ်။ မြန်မာလုပ်သားတွေအများဆုံးသွားရောက် လုပ်ကိုင်တဲ့ မလေးရှားနိုင်ငံက လုပ်သားခေါ်ယူတာရပ်လိုက်ပြီးတဲ့နောက် တခြားနိုင်ငံလုပ်သားစျေးကွက်တွေကိုချိတ်လာကြတာလို့ အေဂျင်စီအသိုင်းအဝိုင်းက ဆိုပါတယ်။ လက်ရှိမှာလာအိုနိုင်ငံနဲ့ အလုပ်သမားရေးရာ သဘောတူစာချုပ်ချုပ်ဆိုလိုက်ပြီးနောက် မြန်မာလုပ်သားတွေအတွက် နေရာတခုထပ်တိုးလာတာဖြစ်ပါတယ်။ ဒါပေမယ့် ပြည်ပကိုထွက်ခွာလိုတဲ့ လုပ်သားအရေအတွက်နဲ့ လုပ်သားခေါ်ယူတဲ့ပမာဏကကွာဟမူများနေတာကြောင့် စျေးကွက်အသစ်ရရှိဖို့လိုအပ်နေတာလို့ အေဂျင်စီဒါရိုက်တာတစ်ဦးကဆိုပါတယ်။ “ဘရူနိုင်းက လုပ်ခသိပ်တော့မကောင်းဘူး။ဒီမှာရတာထက်တော့ပိုတယ်။ လုပ်သားခေါ်တာများရင်တော့သွားမယ့်သူတွေကရှိတယ်”လို့ ပြောပါတယ်။ လက်ရှိမှာ အေဂျင်စီတွေအနေနဲ့ ထိုင်းနိုင်ငံဆီလုပ်သားအများဆုံးစေလွှတ်ပေးနေရပြီး ဒေသတွင်းတခြားနိုင်ငံဆီစေလွှတ်နိုင်ဖို့ အတွက်လည်း​ကြိုးစားနေကြတယ်လို့သူတို့က ပြောပါတယ်။

နိုဝင်ဘာ၁၇၊Migrant Times ထိုင်းနိုင်ငံမှာ နှစ်စဉ်ပြုလုပ်တဲ့ လွယ်ကထုံ ခေါ် သပိတ်မျှော ရိုးရာပွဲတော်မှာ မြန်မာအလုပ်သမားတစ်ဦး ရေနစ်သေဆုံးခဲ့တယ်လို့ ဖူကက်ခရိုင်ဒေသသတင်းဌာနဖြစ်တဲ့ Phuket Times မှာရေးသားဖော်ပြထားပါတယ်။ နိုဝင်ဘာ ၁၆ ရက်နေ့မှာ လူတစ်ဦးရေနစ်နေတယ်လို့ သတင်းရရှိလို့ ဖူကက်ခရိုင်ခြေစိုက် ကယ်ဆယ်ရေးအဖွဲ့တွေက အခင်းဖြစ်ပွားတဲ့ ထလန်မြို့နယ်၊ ဘန်မလွမ်ကျေးရွာက ရေကန်ကြီးတစ်ခုမှာ ရေငုတ်ကယ်ဆယ်ရေးသမား ၄ ဦးအထိသုံးပြုပြီး ၁၀ မိနစ်ခန့်ကြာအောင်ငုတ်ရှာခဲ့ရတယ်လို့ဆိုပါတယ်။ အလောင်းကိုဆယ်နိုင်ခဲ့ပြီးတဲ့နောက်မှာ စစ်ဆေးတွေ့ရှိချက်အရ အသက် ၃၅ မှ ၄၀ ကြားအရွယ်ရှိတဲ့ မြန်မာအမျိုးသားတစ်ဦးဖြစ်နေတယ်လို့ အတိပြောခဲ့ပါတယ်။ ဒေသခံတွေရဲ့ပြောဆိုချက်အရ အဆိုပါသေဆုံးတဲ့မြန်မာအမျိုးသားဟာ မျှောပြီးသား လွယ်ကလုံခေါ် သပိတ်ထဲထည့်ထားတဲ့ ငွေတွေလိုက်ကောက်ရာကနေ ရေမြုတ်သေဆုံးခဲ့တယ်လို့ဆိုပါတယ်။

အပတ်စဥ် စနေနေ့တိုင်းမှာ ရွှေ့ပြောင်းမြန်မာလုပ်သားတွေအတွက် ဗဟုသုတရစေမဲ့ Quiz တွေတင်ဆက်ပေးသွားမှာဖြစ်ပါတယ်။ အခုမေးခွန်းလေးကို Comment မှာဖြေခဲ့ပေးကြပါ ၊ မနက်ဖြန် 4နာရီမှာ အဖြေမှန်ကိုတင်ပေးသွားမှာဖြစ်ပါတယ်။ သိချင်တာမေးချင်တာများရှိရင်လဲ Comment မေးခဲ့လို့ရပါတယ်။ #migranttimes #myanmarworker #migrant #quiz #question #TrueOrFalse #knowledge #KnowledgeIsPower #myanmarworker #Myanmar

နိုဝင်ဘာ ၁၅ရက်၊ Migrant Times ထိုင်းနိုင်ငံမှာရွှေ့ပြောင်းလုပ်သားမြန်မာနှစ်ဦး သေနတ်နဲ့ ပစ်သတ် ခံခဲ့ရတယ်လို့ ဘန်ကောက်ပို့စ်က ဖော်ပြပါတယ်။ သေနတ်ဒဏ်ရာတွေနဲ့ သေဆုံးနေသူ နှစ်ဦးရဲ့ အလောင်းတွေကို မနေ့က နိုဝင်ဘာ ၁၄ရက် မနက်မှာ ရတ်ချာဘူရီမှာရှိတဲ့ ဆွန်ဖွန်ခရိုင်မှာ တွေ့ရှိခဲ့ပါတယ်။ အလောင်းတွေကို ဆွန်ဖွန်က ကျောက်စရစ် လမ်းတစ်ခုမှာ ရှာတွေ့ခဲ့တာလို့ ဒေသခံ ရဲတပ်ဖွဲ့က ဆိုပါတယ်။ သေဆုံးသူတစ်ဦးဟာ အသက် ၄၃နှစ်အရွယ်ကိုအောင်ဆန်းဆိုသူဖြစ်ပြီး ဦးခေါင်းနဲ့ ဝမ်းဗိုက်မှာ ကျည်တစ်ချက်စီ ထိမှန်ထားပါတယ်။ တွေ့ရှိတဲ့အလောင်းမှာ မိုဘိုင်းဖုန်းတစ်လုံး၊ ငွေသားတချို့၊ ရွှေ့ပြောင်းလုပ်သားကတ်၊ ယာဉ်မောင်းလိုင်စင်တွေ ရှိနေခဲ့ပါတယ်။ ကိုက် ၃၀၀လောက် အကွာမှာတော့ နောက်ထပ် အလောင်းတစ်ခု ထပ်တွေ့ခဲ့ပြီး သေဆုံးသူဟာ စောစောဆိုတဲ့ အမျိုးသားလို့ ရဲတွေက နောက် ပိုင်းမှာ အတည်ပြုခဲ့ပါတယ်။